გრძელდება შაბათის შეხვედრები "ბავშვები მწერალთა სახლში". 24 ოქტომბერს გიწვევთ "მსოფლიოს ხალხთა ზღაპრების" პირველ შეხვედრაზე - არაბული ზღაპრები.

მწერალთა სახლი უმასპინძლებს ქართველი მწერლების მთარგმნელებს თურქეთიდან, რომლებიც ისაუბრებენ თავიანთ შემოქმედებაზე და ქართული კულტურის განვითარების ხელშეწყობაზე თურქეთში. 

ჩვენი სტუმრები არიან: მწერალი, ლიტერატორი და მთარგმნელი ქევსერ რუჰი (ქეთევან ხანთაძე), თურქეთში ქართული ენის შემსწავლელი პროგრამის ავტორი, რამდენიმე წიგნის რედაქტორი, 5 წიგნის ავტორი და არაერთი ლიტერატურული პრემიის მფლობელი, თარგმნილი აქვს ქართველი კლასიკოსი პოეტების ლექსები; მწერალი და მთარგმნელი ფაჰრედინ ჩილლოღლუ (ფარნავაზ ჩილაშვილი), თარგმნილი აქვს ოთარ ჭილაძის „გზაზე ერთი კაცი მიდიოდა“, ნოდარ დუმბაძის „მზიანი ღამე“, დათო ტურაშვილის „ჯინსების თაობა“, ერლომ ახვლედიანის „კოღო ქალაქში“, გალაკტიონის, ტიციან ტაბიძის და მუხრან მაჭავარიანის ლექსები; ქართული პოეზიის მთარგმნელი ჰასან ჩელიქი, რომელიც ამჟამად მუშაობს „ვეფხისტყაოსნის“ თარგმანზე, ერდალ ქუჩუკი (ელიზბარ ცივნარიძე), სტამბულში ქართული კულტურის სახლის თავმჯდომარე;
პროექტი „მწერალთა სახლი და ქართული დიასპორები“ ხორციელდება საქართველოს პრეზიდენტის ფონდის ფინანსური მხარდაჭერით.

28 ოქტომბერს, საღამოს 5 საათზე, მწერალთა სახლში გაიმართება მწერალ რევაზ კვერენჩხილაძის ორი წიგნის პრეზენტაცია. საზოგადოებას წარედგინება: "წამების გზა" და "საქართველოს ბედი და ქართული ლიტერატურა და ხელოვნება" . რევაზ კვერენჩხილაძე ისაუბრებს სამომავლო წიგნების გამოცემის პერიპეტიებსა და გეგმებზე. საღამოს გაუძღვება ბატონი ილამაზ მიწიშვილი, ცისფერყანწელი პოეტის ნიკოლო მიწიშვილის ვაჟი, საზოგადოება "მემორიალის" ერთ-ერთი ხელმძღვანელი.