3 აპრილს, 19:00 საათზე, მწერალთა სახლი/Writers' House of Georgia გაიმართება ბაბო შარვაშიძის „მემუარების“ წარდგენა.

◾️„ბაბო შარვაშიძე (დაბ. 1859 წელს, სოფელ ლიხნიში) უშთამომავლოდ, უსამშობლოდ გარდაიცვალა ქალაქ ლონდონში და თავისი მოგონებების წიგნი სახსოვარივით დაუტოვა მოხუც, ერთგულ მეუღლეს, ალექსანდრე მეიენდორფს. მთავრის ქალიშვილის ავტობიოგრაფიული, თანმიმდევრული თხრობა უკვე ხანდაზმულ ასაკში არა წარსულისგან თავის დაღწევის, არამედ დროის გადასახედიდან წარსულის მოვლენათა შეფასების მცდელობაა და უნიკალურია თავისი მნიშვნელობით. ის ერთგვარი ილუსტრაციაც შეიძლება გახდეს ურთულესი, გარდამავალი ეპოქის რეალიების გაცოცხლებისათვის, თუნდაც ქართულ-აფხაზური ურთიერთობების ნიუანსების ახსნისათვის“ (ნინო ხოფერიას ბოლოსიტყვაობიდან).

ინგლისურიდან თარგმნა, კომენტრები, შენიშვნები, გენეალოგიური ტაბულები და საძიებლები დაურთო მაია ცერცვაძემ.

დასწრება თავისუფალია.

გამომცემლობა ალეფი გიწვევთ მწერალთა სახლში ახალი გამოცემის წარდგენაზე – მირჩა ელიადეს "მითები, სიზმრები და მისტერიები". (მთარგმნელი: მზია გომელაური, რედაქტორები: ხათუნა თავდგირიძე, ელზა ახვლედიანი).

მირჩა ელიადეს წიგნისა და მისი შემოქმედების შესახებ ისაუბრებს:
წიგნის სამეცნიერო რედაქტორი, მითოლოგი – ხათუნა თავდგირიძე

სამაგიდო თამაშები ყოველთვის იყო ერთ-ერთი კარგი საშუალება როგორც გასართობად, ასევე გონების სავარჯიშოდ. ხოლო თუ ეს სამაგიდო თამაში ქართული ლიტერატურის საგანძურს, "ვეფხისტყაოსანს" ეხება, კიდევ უფრო მეტი სიამოვნება გელით.
ჩვენი მომდევნო შეხვედრა სწორედ "ვეფხისტყაოსნის" სამაგიდო თამაშებს დაეთმობა.

ბავშვებს დახვდებათ სხვადასხვა სახეობის ხის ეკოლოგიურად სუფთა გრავირებული სამაგიდო თამაშები ვეფხისტყაოსნის თემაზე.

თამაშები შეიცავს თამარ მეფის მონეტებეს, რუსთაველის მარკებს, აფორიზმებს, ქვიშის საათს, ილუსტრაციებს, პოემის ინტერაქტიულ რუკას და სხვა დეტალებს, რაც თამაშს და მოგზაურობას რუსთაველის სამაყაროში სახალისოს ხდის. ის კარგი საშუალებაა სწავლა გათავისუფლდეს დამღლელი საზეპიროებისგან და სახალისო შემეცნებითი პროცესი გახდეს. ეს არის ერთგვარი დამატებითი, ალტერნატიული საშუალება სწავლების მეთოდებში.

თამაშებს წარმოგიდგენთ მისი ავტორი, ლიტერატურათმცოდნე ლევან გელაშვილი. შეხვედრაზე არა მარტო გაეცნობით თამაშებს, არამედ საშუალება გექნებათ, ითამაშოთ კიდეც.

შეხვედრები "ბავშვები მწერალთა სახლში" იმართება შაბათობით, 13:00 საათზე. შეხვედრებს უძღვება საბავშვო მწერალი ვასო გულეური. დასწრება თავისუფალია.

ხუთშაბათს, 11 აპრილს, 19:00-ზე გიწვევთ ისაბელ ალინდეს რომანის - "სულების სახლი" - პრეზენტაციაზე. რომანზე მწერალი დათო გორგილაძე და ეროვნული ბიბლიოთეკის დირექტორი, მწერალი გიორგი კეკელიძე ისაუბრებენ.


„სულების სახლი“ ლათინური ამერიკის ერთ-ერთი ყველაზე პოპულარული მწერალი ქალის, უამრავი საპატიო პრემიის ლაურეატის, ისაბელ ალიენდეს პირველი რომანია. რომანში ისტორიული წარსული მაგიური რეალიზმის საბურველშია გახვეული, აწმყო კი მკაცრი რეალობის სახითაა გადმოცემული, რომელშიც ლათინური ამერიკის ძალადობრივი და ხშირად უსამართლო პოლიტიკა ორი პროტაგონისტის - ალბასა და ესტებანის პერსპექტივიდანაა დანახული.

დასწრება თავისუფალია.

ემიგრანტ შემოქმედთა მხარდაჭერისა და პოპულარიზაციის საერთაშორისო ფონდი, საქართველოს მწერალთა შემოქმედებითი
კავშირისა და ქართული ემიგრაციის მუზეუმის პარტნიორობით იწყებს ახალ პროექტს, ლიტერატურულ-შემეცნებითი საღამოების ციკლს, „ქართული ემიგრაცია - წარსული და დღევანდელობა“. პირველი საღამო ჩატარდება ა.წ. 12 აპრილს, 17.00 სთ. მწერალთა სახლის სააქტო დარბაზში. მაჩაბლის ქ. N 13.

საღამოს სტუმარია ამერიკაში მოღვაწე ქართველი ბალეტმეისტერი, ბატონი ნიკოლოზ მახათელი. ვისაუბრებთ ასევე მისი დიდი წინამორბედების, ამერიკული ბალეტის ფუძემდებლის, ჯორჯ ბალანჩინისა და პრიმა ბალერინას, ამერიკული ბალეტის დივას, თამარა თუმანოვა-თუმანიშვილის შემოქმედებისა და ღვაწლის შესახებ საბალეტო ხელოვნებაში.
გულთბილ და საინტერესო მოგონებებით გაჯერებულ საღამოზე სიურპრიზებსაც შემოგთავაზებთ.

დასწრება თავისუფალია

2 აპრილს მსოფლიო საბავშვო წიგნის დღე აღინიშნა. ეს თარიღი შემთხვევით არ არის შერჩეული. 2 აპრილი ხომ მსოფლიოს დიდი მეზღაპრის, დანიელი მწერლის, ჰანს კრისტიან ანდერსენის დაბადების დღეა.
ჩვენი შეხვედრაც ამჯერად სწორედ ანდერსენს და მის შემოქმედებას ეძღვნება.

შეხვედრები "ბავშვები მწერალთა სახლში" იმართება შაბათობით, 13:00 საათზე. შეხვედრებს უძღვება საბავშვო მწერალი ვასო გულეური. დასწრება თავისუფალია.

14 აპრილს GAU გიწვევთ დედაენის დღისადმი მიძღვნილ ერთდღიან ფესტივალზე “GAUზიარე 33 ემოცია“!

13:00-19:00
ფესტივალი გრძელდება მწერალთა სახლში! (მაჩაბელის #13)
• ანსამბლი რუსთავი - საქართველოს ჰიმნი;
• საჯარო ლექციები ქართული ენის შესახებ: პოეტი რატი ამაღლობელი; მწერალი დათო ტურაშვილი, ფსიქოლოგი ნათია ფანჯიკიძე.
• თემატური თამაშები სიმბოლური პრიზებით;
• ანთოლოგიის „ქართული ანბანი - 33 ემოცია“ პრეზენტაცია და სპეციალური ფასდაკლება წიგნზე;
• წიგნებისა და ანბანთან დაკავშირებული ხელნაკეთი ნივთების გამოფენა-გაყიდვა; ანთოლოგია "ქართული ანბანი - 33 ემოცია" გაიყიდება ფასდაკლებით!
• ბლოგების კონკურსში გამარჯვებული სკოლის მოსწავლეების დაჯილდოება;
• ხელნაწერთა ეროვნული ცენტრის სტენდი, სადაც სპეციალურად თქვენთვის შეიქმნება წერილები ქართველი კლასიკოსების კალიგრაფიის შრიფტით;
• GAU ბენდი;
• დათო ევგენიძის კონცერტი.

ფესტივალის მიზანია ქართული ენის მნიშვნელობის ხაზგასმა და იმ საერთო ღირებულების აღნიშვნა, რომელიც საუკუნეების განმავლობაში გვიცავს და გვაძლიერებს, განგვასხვავებს სხვა ერებისგან და ქმნის განსაკუთრებულ კულტურულ მემკვიდრეობას.

ფესტივალის სპონსორები: მწერალთა სახლი/Writers' House of Georgia, ხელნაწერთა ეროვნული ცენტრი / National Centre of Manuscripts, Palitra L Publishing • გამომცემლობა პალიტრა L, Askaneli Brothers · ასკანელი ძმები