მწერალთა სახლში ჩატარდება კომპოზიტორ მაია ელოშვილის საბავშვო სიმღერების კრებულის ''მზის ხომალდი" პრეზენტაცია.
საღამო საქველმოქმედოა..შემოსული თანხა გადაეცემა სიმსივნით დაავადებულ კომპოზიტორs ძვირადღირებული მედიკამენტის შესაძენად (ეს მედიკამენტი დაზღვევით არ ფინანსდება).

ღონისძიება ორგანიზებულია საქართველოს რუსთაველის საზოგადოების მიერ

მწერალთა სახლი გიწვევთ შეხვედრაზე კინომცოდნესა და პუბლიცისტ გოგი გვახარიასთან, რომლის წიგნიც „ცრემლიანი სათვალე“ წლეულს ლიტერატურული პრემია „საბას“ გამარჯვებული გახდა ნომინაციაში „საუკეთესო დოკუმენტური პროზა“
ლექციის თემაა „სიკვიდილი ვენეციაში“ - მოთხრობიდან ეკრანიზაციამდე.
ამ ლექციით მწერალთა სახლი იწყებს ერთ-ერთ ახალ ციკლს, რომელსაც კინოენა და თანამედროვე ტენდენციები ჰქვია.
ლიტერატურის ეკრანიზაციას საკმაოდ ხანგრძლივი ისტორია აქვს. დღემდე გრძელდება კამათი იმის თაობაზეც, რამდენად აუცილებელია ცნობილი კლასიკოსების ნაწარმოებების ეკრანიზაცია და ხომ არ გამოიწვევს ეს წიგნისადმი ინტერესის დაკარგვას. თუმცა, ალბათ, არაერთი ისეთი მხატვრული ფილმის დასახელებაც შეგვიძლია, რომელთა ეკრანული ვიზუალიზაცია უფრო მაღალმხატვრულია, ვიდრე ის მოთხრობა თუ რომანი, რომლის მიხედვითაც ფილმი გადაიღეს.

17 ოქტომბერს, 19. 00 მწერალთა სახლი გიწვევთ რენე კალანდიას ხსოვნის საღამოსა და მისი პოეტური კრებულის პრეზენტაციაზე.
ხელოვნებათმცოდნე დავით ანდრიაძე წიგნის შესავალში საინტერესოდ მიმოიხილავს პოეტის შემოქმედებას. ერთგან იგი ამბობს: „რენე კალანდიამ მაშინ დაიწყო ლექსების გამოქვეყნება, როდესაც ქართულ პოეზიაში ჯერ კიდევ კეკლუცობდა სტილიზაცია; სტილიზაცია, როგორც საბჭოთა პოეზიის იდეალი...
60 -იანი წლებიდან „საბჭოთა ავტორმა“ ხელისუფლებას გამოსტაცა საკუთარი გამოთქმის ახალი სივრცე და ეს სივრცე თანდათან დაფიქსირდა, როგორც ავტორის მიღმა გამაგრებული „ნაკეთობა“, შემდგომ გაფართოებას მოკლებული ვერსიფიკაციული არტეფაქტი...
რენე კალანდიამ ეს გალექსილი არტეფაქტი ერთგვარ „ინტელექტუალურ ბარათად“ აქცია.
რენე კალანდიას პოეტური ტექსტები, ლირიკულ რეფლექსიათა წიაღ, ირონიულ პლანში ითავსებენ კიჩ-ემბლემეტიკას და მისი ადამიანური (ერთობ ადამიანური?) პასიონებიც გაუცხოებისდა კვალობაზე, ერთგვარ პოეტურ მედია- ობიექტებად გარდაისახებიან.“
საღამოზე პოეტის ცხოვრებისა და შემოქმედების შესახებ მწერლები და მეგობრები ისაუბრებენ.

20-27 ოქტომბერს ქ. თბილისის მერიის კულტურული ღონისძიებების ცენტრის მხარდაჭერით მწერალთა სახლში გაიმართება გამოჩენილი ქართველი პოეტის, იოსებ გრიშაშვილის 125 წლისთავისადმი მიძღვნილი საიუბილეო კვირეული, რომელიც მოიცავს პოეტის ცხოვრების საინტერესო ეტაპების ამსახველ უნიკალური ფოტო და დოკუმენტების გამოფენას, იოსებ  გრიშაშვილის სახლმუზეუმთან თანამშრომლობით მოწყობილ ინსტალაციას, გრიშაშვილის პოეზიის კითხვის საღამოს (რომელშიც მონაწილეობას მიიღებენ ახალგაზრდა ქართველი პოეტები), თემატურ ლექციებს გრიშაშვილის შემოქმედებისა და ცხოვრების შესახებ უფროსკლასელთათვის; ლექციას წაიკითხავs გივი შაჰნაზარი.

პროექტის მიზანია, ხელი შეუწყოს ქართული ლიტერატურის ერთ-ერთი გამორჩეული ფიგურის, იოსებ გრიშაშვილის შემოქმედებისა და მისი საზოგადო მოღვაწეობის მნიშვნელობის პოპულარიზებას, განსაკუთრებით ახალგარზდა თაობის მკითხველთა დაინტერესებას.

ლევან გიგინეიშვილი ციკლიდან "საუბრები ლიტერატურაზე" ჩვენი დროის ერთ-ერთ უდიდეს მწერალზე, უმბერტო ეკოზე და მის რომანზე,  "ვარდის სახელზე" ისაუბრებს.