მწერალთა სახლი აცხადებს  ფანტასტიკის ჟანრის მოთხრობების კონკურსს უფროსკლასელებისთვის.

კონკურსში მონაწილეობა შეუძლიათ საქართველოს საჯარო და კერძო სკოლების IX-XII კლასის მოსწავლეებს.

თემა თავისუფალია, მოთხრობა უნდა იყოს ფანტასტიკის ჟანრის და არ უნდა აღემატებოდეს 1000 სიტყვას.

რატომ ავირჩიეთ ფანტასტიკის ჟანრი?

ოცდამეერთე საუკუნემ მრავალი ახალი გამოწვევის წინაშე დააყენა კაცობრიობა. ტექნოლოგიური პროგრესის კვალდაკვალ მივიღეთ  ეკოლოგიური კატასტროფები, კოსმოსში მოგზაურობის პარალელურად - პანდემიები, კულტურის განვითარების საპირწონედ კი - ტერაქტები და ომები.

ბევრი რამ, რაც მეოცე საუკუნეში ფანტასტიკის სფეროს მიეკუთვნებოდა, ოცდამეერთე საუკუნის დასაწყისში სინამდვილედ  იქცა და დიდი სისწრაფით განვითარდა. ვირტუალური და რეალური სამყარო ერთმანეთს ისე გადაეჯაჭვა, რომ ზოგჯერ მათ შორის ზღვარის გავლება ჭირს.

დღეს ჩვენ აღმოვჩნდით ისეთ რეალობაში, რომელიც თითქოს იმიტირებს ლიტერატურას და ხელოვნებას. იზოლაციაში მყოფები ვპოულობთ მსგავსებას ამჟამინდელ ვითარებასა და სხვადასხვა ნაცნობ მხატვრულ სიუჟეტს შორის. სიფრთხილის ზომები და მოქალაქეობრივი პასუხისმგებლობა „შინაპატიმრობაში“ დარჩენას გვაიძულებს. ლიტერატურა კი იზოლაციაში დროის სასიამოვნოდ გატარებასა და შემეცნებაში გვეხმარება.

კონკურსის პირობები:

საკონკურსო ნაწარმოების თემა  შეიძლება იყოს სამყაროს ხვალინდელი დღე, პლანეტის და კაცობრიობის მომავალი - არჩევანი დიდია და თავისუფალი.

საკონკურსო მოთხრობები უნდა გამოგზავნოთ ელექტრონული სახით  მისამართზე contest@writershouse.ge  ნაშრომი უნდა იყოს Microsoft word-ში ქართული უნიკოდით (შრიფტი - Sylfaen, ზომა - 12) აკრეფილი და არ უნდა აღემატებოდეს 5 გვერდს (1000 სიტყვას). წერილში აუცილებლად მიუთითეთ  სათაური, კონკურსანტის სახელი, გვარი, სკოლა, კლასი და საკონტაქტო ტელეფონი. (არასრული საკონტაქტო ინფორმაციის წარმოდგენის შემთხვევაში განაცხადი არ მიიღება)

საკონკურსო ნაწარმოებების მიღების ბოლო ვადაა 5 ივნისი.

მეორე ეტაპზე გადასული საკონკურსო ნაწარმოები გამოქვეყნდება ონლაინ ბლოგზე https://whgeorgia.blogspot.com/

ნამუშევრებს შეაფასებს კონფიდენციალური ჟიური, რომელიც 3 გამარჯვებულს გამოავლენს.

1. პირველი პრემია - მაღაზია ზუმერის  500 ლარიანი ვაუჩერი
2. მეორე პრემია -  მაღაზია ზუმერის 400 ლარიანი ვაუჩერი
3. მესამე პრემია - მაღაზია ზუმერის 300 ლარიანი ვაუჩერი

გისურვებთ წარმატებებს!